بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت .. قارب نجاة
قالوا مفيش
غير بس هو الحب قارب نجاه
عجبي !!!
***
فارس وحيد جوه الدروع الحديد
رفرف عليه عصفور وقال له نشيد
منين .. منين.. و لفين لفين .. يا جدع
قال من بعيد و لسه رايح بعيد
عجبي !!! ***
مرات أفوق و يحل عني غبايا
و أفتكر إني فهمت كل الخبايا
و افتح شفايفي عشان أقول الدرر
ما قولش غير حبة غزل في الصبايا
و عجبي... ***
يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي !!! ***
أنا قلبي كان شخشيخة أصبح جرس
جلجلت بيه صحيوا الخدم والحرس
انا المهرج , خفتوا ليه, قمتوا ليه
لا في ايدي سيف ولا تحت مني فرس
وعجبي
***
ولدي نصحتك لما صوتي اتنبح ..
ما تخافش من جني ولا من شبح ..
وان هب فيك عفريت قتيل اساله ..
ما دافعش ليه عن نفسه يوم ما اندبح ..
وعجبي
***
يأسك وصبرك بين ايديك وانت حر
تيأس ما تيأس الحياة راح تمر
أنا دقت من دة ومن دة وعجبي لقيت
الصبر مر وبرضه اليأس مر
عجبي
***
علي بــعد ملـــيون مــيل من أرضنا
من الفــراغ الــكوني بصــيت أنـا
لا شفت فرق ما بين جبال و بحور
ولا شفت فرق ما بين عذاب أو هنا
عجبي
***
أنا كل يوم أسمع .. فلان عذبوه
أسرح ف بغداد والجزاير واتوه
ما أعجبش م اللي يطيق بجسمه العذاب
وأعجب من اللي يطيق يعذب أخوه
عجبي!!
***
إقلع غماك يا تور وارفض تلف
اكسر تروس الساقية واشتم وتف
قال بس خطوة كمان .. وخطوة كمان ..
يا اوصل نهاية السكة يا البير يجف
عجبي
دخلت بيتى مره لقيتنى ضيف
سألت ليه هاملين البيت و مزوقين الرصيف؟
شاورلى واحد ع الجدار لقيت صليب
بصيت له بالمقلوب شُفت سيف
وعجبى
طايره م الفرح بجمالها و بالهدوم
قُلت حب الحياه شىء بديع ع العموم
و اللى يحب الحياه مهما يقع راح يقوم
لكن مش كان من الذكا تدور عاللى يدوم
و عجبى
قالوا ع الحب تملك و سموه ساعات جبروت
على شهده و مراراه ياما كتبوا من الشعر بيوت
قالوا كلام كتيــر و كان احسن لهم السكوت
الحب ببساطه هو الحياه و قبل منها هو الموت
و عجبى
حلمت و احلامى انا مجانين
جالى فى المنام بلياتشو و احلف يمين
جه مستربع ع الهرم و كنت انا بارقص له
بس ما كنتش لوحدى كان معايا من البشر ملايين
و عجبى
اشعرينى بالوجود خبّرينى عن الخلود
و قودينى فى الدروب واحمينى من قساوه القلوب
اروينى بالحنان إحيى فىّ الإنسان
فالموت للوجدان اصعب من الإمكان
_____________
دمرى جبل كبريائى و ابحثى فىّ عن دوائى
فالدنس كان ردائى وإبتعدت عن حيائى
_______________
عدينى بالسعاده فالحزن كان كالعباده
و إجعلى لكِ الرياده فقد عشت حياهٍ لم يذق فيها رأسى طعم الوساده
_____________
ابحثى لى عن طريق فقد فاتنى كل صديق
ولم اجد سواكِ رفيق فلولاكِ لكان السقوط العميق
______________
و إعلمى انى مدين بعمرى لو كان ثمين
بقلبى حتى ولو حزين لكِ يا اقوى حنيـــن
____________
اشعرينى بالثبات امحى كل الذكريات
فـ انا القديم مات و بقوتكِ سأتحرر من اى ذات
_____________
فـ انت كنتِ الملاك من ارسلكِ ؟ اهو الإله ؟
نعم , فقد كنت على شفا الهلاك لولا ظهورك بنورك فتبارك فى علاه
الخميس أغسطس 21, 2008 10:33 am