يا طير يا عالي في الســــــما طظ فيك
ما تفتكرشي ربنا مصطــــــــــــــــفيك
برضـــــــــــك بتاكل دود و للطين تعًًًًودً
تمـــــــــص فيه يا حلو .. و يمص فيك
عجبي !!!
*******************************************
يا عندليب ماتخافش من غنوتك
قول شكوتك و احكي عن بلوتك
الغنوة مش هتموتك إنما
كتم الغنا هو اللي هيموتك
!عجبي
**************************************
يا للي بتبحث عن إله تعبده
بحث الغريق عن أي شيء ينجده
الله جميل و عليم و رحمن رحيم
إحمل صفاته ... و انت راح توجده
!عجبي
*****************************************
غمض عينيك و امشي بخفة و دلع
الدنيا هي الشابة و انت الجدع
تشوف رشاقة خطوتك تعبدك
لكن انت لو بصيت لرجليك ... تقع
!عجبي
**********************************
أوصيك يا ابني بالقمر و بالزهور
أوصيك بليل القاهرة المسحور
و إن جيت في بالك ... اشتري عقد فل
لأي سمرا ... و قبري إوعك تزور
!عجبي
********************************
لو فيه سلام في الأرض و طمان و أمن
لو كان مفيش و لا فقر و لا خوف و جبن
لو يملك الإنسان مصير كل شيء
أنا كنت أجيب للدنيا ميت ألف ابن
!عجبي
**********************************
جالك أوان و عرفت مشي الجنايز
كيف شفتها يا عبد رب اللذايذ
قال: شفت شيل بالحيل فقير أو أمير
كما شالوا في الحمامير فواضي القزايز
!عجبي
*************************************
يا للي انت بيتك قش مفروش بريش
تقوى عليه الريح. يصبح مفيش
عجبي عليك حواليك مخالب كبار
و ما لكش غير منقار و قادر تعيش
!عجبي
**********************************
يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد ... زي الصداع
!عجبي
***********************************
أنا قلبي كان شخشيخة أصبح جرس
جلجلت بيه صحيوا الخدم و الحرس
أنا المهرج ... قمتو ليه خفتو ليه
لاف إيدي سيف و لا تحت مني فرس
!عجبي
**********************************
حبيت...لكن حب من غير حنان
وصاحبت لكن صُحبه مالهاش أمان
رحت لحكيم واكتر لقيت بلوتي
إن اللي جوّه القلب مش ع اللسان
!عجبي
******************************************
إيش تطلبي يا نفس فوق كل ده
حظك بيضحك وانتي متنكدة
ردت قالت لي النفس: قول للبَشَر
ما يبصوليش بعيون حزينة كده
!عجبي
*****************************************
الدنيا أوده كبيرة للانتظار
فيها ابن آدم زيّه زي الحمار
الهم واحد...والملل مشترك
ومفيش حمار بيحاول الانتحار
!عجبي
******************************************
بحر الحياه مليان بغرقى الحياه
صَرَخت خش الموج في حلقي ملاه
قارب نجاه!...صَرَخت قالوا مفيش
غير بس هو الحب قارب نجاه
!عجبي
**************************************
إنشد يا قلبي غنوتك للجمال
وارقص في صدري من اليمين للشمال
ماهوش بعيد تفضل لبكره سعيد
ده كل يوم فيه ألف ألف احتمال
!عجبي
***************************************
زحام وأبواق سيارات مزعجة
إللي يطول له رصيف...يبقى نجا
لو كنت جنبي يا حبيبي أنا
مش كنت أشوف إن الحياة مبهجه؟
!عجبي
*************************************
إيديا في جيوبي وقلبي طِرب
سارح في غربة بس مش مِغترِب
وحدي لكين وَنسان وماشي كده
وبابتعد...ما اعرفش...أو باقترِب
!عجبي
*************************************
فتحت شباكي لشمس الصباح
ما دخلش منه غير عويل الرياح
وفتحت قلبي عشان أبوح بالألم
ما خرجش منه غير محبة وسماح
!عجبي
*************************************
أنا الذي عمري اشتياق في اشتياق
وقطر داخل في محطة فراق
قصدت نبع السم وشربت سم
من كتر شوقي وعشمي في الترياق
!عجبي
****************************************
اتمنى ان الاشعار تعجبكوا وياريت تدوروا على المعانى الضائعة وسط الكلام حقيقى جميلة
ِعش ما شئت فإنك ميتُُُ
و أحبب من شئت فإنك فارقه
و اعمل ما شئت فإنك مجزي به
الزجل ده غزل فى عيون البقر
يا حلاوة عيونه الوساع
مافيهاش و لا نقطة ضياع
فيها ليل بس من غير سهر
فيها بحر غويط
فيها صبر عبيط
زى صبر الشجر
يا حلاوة عيون البقر
شعرا شبهوا عيون حريمهم بها
و نا شاعر و له واحده بيحبها
إنما يستحيل
سيبنا من الشعرا
احنا ناس فقرا
و اللى يعشق فتاة فيها م البقرة
يبقى لمؤاخذة تور
**********************************************
الساعة اتنين صباحاً
االنور ملو الشوارع
و مليون راديو والع
الساعة اتنين صباحاً
لكين إيه الموانع
الخلق رايحة جايه
و الدنيا لسه حيه
مليانة بالهأو أو
و زعيق القهوجية
واحد يقول لواحد:
خليك ياعم قاعد
التانى يقول: شكراً
ده أنا م المغرب مواعد
فيه سهرة لسه عندى
فى بيت فلان فندى
ح ناكل حاجه حلوه
و نشرب تمر هندى
و اللى تروح دالقة جردل
فوق حضرة المبجل
طبعاً صاحبنا يزعل
و ينفجر شتايم
والحى كله يوصل
مابين مصلح و لايم
اللى يقول: ياجماعة
و اللى يقول: يا بهايم
و مطرب الإذاعة
يصرخ و فى وجده هايم
ولو طرطقت ودنك
فى وسط دى العظايم
تسمع مسحراتى
بطبلة صوتها واطى
بيقول: اصحى يانايم
اجمل رباعيات صلاح جاهين
ولدى نصحتك لما صوتى اتنبح
متخفش من جنى ولا من شبح
وان هب فيك عفريت قتيل اسأله
مدفعش ليه عن نفسه يوم ما اندبح
عجبى!
ليه يا حبيبتى ما بينا ديما سفر
ده البعد زنب كبير لا يغتفر
ليه يا حبيبتى ما بينا ديما بحور
اعدى بحر الاقى غيره اتحفر
عجبى!
سمعت نقطه ميه جوه المحيط
بتقول لنقطه متنزليش فالغويط
اخاف عليكى م الغرق قلت انا
ده اللى يخاف م الوعد يبقى عبيط
عجبى!
الخميس أغسطس 21, 2008 10:30 am